طفلك سخن … كيف تقيسي حرارته .. وما هو العلاج الأنسب لعمره ؟

طفلك سخن … كيف تقيسي  حرارته .. وما هو العلاج الأنسب لعمره ؟ طفل سخن _ صورة إرشيفية

قال الدكتور،عماد حمدي، المتحدث الإعلامي لمديرية الصحة بقنا، إن هذه الفترة من العام ترتفع فيها حرارة الجسم للاطفال ، بغض النظر عن الاسباب سواء فيروسية أو بكتيرية، ولكن تصل مع بعض الاطفال للتشنجات.
ابنك سُخن….
اتأكدتي يعني؟؟
جبتي ترمومتر، وقيستي درجة الحرارة، طيب !! عارفه ان الترمومتر انواع ؟؟
*زئبقي ودا الأدق.
*ديجتال ودا المفضل.
*رقمي بيقيس من الجبهة او عبر الاذن.
*شريط ..ولا ليه أى لازمة لانه بيقيس درجة حرارة الجلد فقط، وممكن يكون مؤشر خاطئ.

طيب !! عارفه إن الحرارة الطبيعية للجسم، من ٣٦.٢ :٣٧.٢ درجة مئوية، بمتوسط ٣٧ درجة

طيب !! عارفة إن الحرارة درجات، -دافي ودا من ٣٧.٥ الي ٣٨ درجة هاجر، -سخن فوق ٣٨.٥ low grade fever
-سخن جدا فوق٣٩.٥ high grade fever

طيب !! عارفة تقيسي الحرارة ازاي:

*فتحة الشرج بنقلل نصف درجة.
* تحت الابط بنزود نصف درجة.
*من الفم زي ماهي بدون زيادة او نقصان.

مثلا الحراره بالترمومتر طلعت ٣٨ درجة ،لو من الفم ٣٨ درجة، أومن تحت الابط ٣٨.٥ درجة، ومن فتحة الشرج ٣٧.٥ درجة.

طيب!! عارفة تعملي أيه لو ابنك سخن!

أول حاجه تخففي هدومه ..موضوع أننا نلبسه كتير لانه بردان دا غلط، وبيساعد علي زيادة الحرارة ، الرعشة حاجه طبيعيه لان الجسم في عملية دفاع مع سبب الحرارة،  سواء فيروس أو بكتيريا، ولازم نساعده بتخفيف الملابس، ويشرب سوائل كتير، ونعمل كمادات

كمادات !!! !!!!!! وهو بردان.
ايوه كمادات ودا الحل الأمثل.
وافضل امكانها في الجسم، الاماكن اللي فيها أوعية دمويه كبيره وهي
-جانبي الرقبة.
-تحت الابط.
-اسفل البطن.
-الفخذين.

وممكن ناخد الطفل لو الحرارة عالية جداً، ونحط نصفه الاسفل من السرة لتحت، واحنا نازلين تحت المياه مباشرة..أو نملأ الحوض مياه، ونحطه نصه التحتاني فيها ..او نملأ البامبرز مياه ونلبسه له.
والمياه تكون فاترة مش ساقعة ..الساقعة بتقلب بنتيجة عكسية..وممكن نحط عليها ملعقة (خل) لو الطفل مفيش عنده حساسيه منه..لكن موضوع الكحول دا غلط جداً ..بيمتص عن طريق الجلد وممكن يعمل تسمم، لو حصله استنشاق.

طيب!! والكمادات الجيل الجاهزه اللي بتتلزق:
ممكن نحط واحدة علي البطن والظهر، ونسيبها ٨ ساعات…لكن الكمادات العاديه افضل مائة مرة.

طيب !! والخوافض !!؟؟

**قبل 6 شهور
-الباراسيتامول هو الافضل كأمان للطفل
زي:
سيتال نقط..نقطتين لكل كجم، يعني لو الوزن ٥ كجم يبقي ١٠ نقط، كل ٦او ٨ ساعات

**بعد ٦ شهور

-البارسيتامول شراب
زي سيتال ٢٥٠، جرعته الوزن علي ٤، يعني لو الوزن ١٠ كجم يبقي ٢.٥سم، كل ٦ او ٨ ساعات، -البروفين شراب، نصف الوزن كل ٦-٨ ساعات، يعني لو الطفل ١٠كجم، يبقي ٥ سم كل ٦ او ٨ ساعات.

**بعد سن سنتين
الباراسيتامول والبروفين زي ما قولنا، مع -الديكلوفيناك زي، +كاتافلاي شراب وده بالذات بفضل بعد عمر 5 سنوات، الوزن علي ٣
يعني لو ٩ كجم يبقي ٣ سم كل ٨ ساعات.،او الشهير، دولفين او فولتارين لبوس فيه منه تركيز
١٢.٥ و ٢٥ و ٥٠، لبوسه١٢.٥ او اتنين لكل ١٠ كجم في اليوم كله، ولو تركيز ٢٥ بعد سن سنتين ويكون وزنه كويس around ١٥ كجم
-تركيز ٥٠ دا للكبار، وممنوع الاستخدام الا بعد عمر سنه، او الكاتافلام نقط، نقطة لكل كجم في اليوم كله، يعني لو ١٢ كجم، يبقي ٤ نقط كل ٨ ساعات
الافضل والآمن للطفل هو السيتال او البروفين، وبنحاول منستخدمش الدولفين او الكتافلاي، الا في حالات قليلة خالص، ولازم تلتزمي بالجرعات، علشان الدواء يجيب وبرضه ميحصلش منه اضرار.

الوسوم