أنا لو رئيس.. شعر

أنا لو رئيس.. شعر

شعر- محمود الحبكي:

أنا لو رئيس
حادخل أفتش في السجون ع المظلومين،
واسمع شكاوى المحرومين،
وادخل كمان مستشفيات
ومعايا فاكهة لعيانين
أنا لو رئيس
حاتمشي فـشوارع
حواري الغلبانين
وأقرا اللي مكتوب
في الكفوف للشقيانين،
واتخفي في هدوم عادي
من غير الحرس
علشان ردود فعل الكمين
أنا لو رئيس
حاقلب جيوبي وذمتي
وانتوا اللي تكتبوا كلمتي
والعدل حيكون حكمتي
وهو اليمين
أنا لو رئيس
الاختلاف مش نفي
ولا كسر الجناح
والاعتراض يصبح متاح
والرأي من غير ضغط
ولا خنق البراح
والحق ليه يصبح سجين
أنا لو رئيس
حارفض أعيش في القصر
واسكن في القلوب
وأفرح بعين تنقدني
وتقول عالعيوب
بعدالة ..عيش.. حرية
راح تحيا الشعوب
والشعب لو احتج
حاركن عاليمين
أنا لو رئيس…