“دقت ساعة النصر” شعر عامي لـ “حنا عادل”

“دقت ساعة النصر” شعر عامي لـ “حنا عادل” حنا عادل النجار

دقت ساعة النصر

الساعة 2.5 قبل العصر

دقة ساعة الإنتصار

الساعة اللي رمينا فيها ع إسرائيل العار

ساعة اختلط فيها

دم محمد ومينا

دم رفض ينشف قبل ما تتحر سينا

دم كتبنا بيه النصر

دم بسببه أترسمت الابتسامة

ابتسامة غابت من بيوت يامه

مرجعتش غير ف يوم الكرامة

كتبنا ع جبينا الشهادة

الرصاصة اللي كانت بتجي فينا

كانت بالنسبالنا باب للجنة والسعادة

احكيلي على الآذان

ومعاه صوت الجرس

طيب فاكر محمد لما كان راكع بيصلي

ومينا واقفله بالسلاح حرس

فاكر ضحكته السمرة

ودمه اللي سال ع الرملة

ضحكه مقدرش يقتلها المدفع

اندفن والابتسامة مشققة خدودوه

فرحان بالعبور وإنه حقق لبلده وعوده

عبرنا بكل عزيمة

رجلينا كانت ثابتة

كأنها مربوطة بكلابش ورافضه الهزيمة

أصلنا شعب عنيد ومبيخافش

فينا اللي رجع حكي الحكاية

وفينا اللي رجع ملفوف بعلم مصر

وف النهاااية.. دقت ساعة النصر

الوسوم